Curaçao North Sea Jazz a habri cu sabor cubano y un publico cu a sorprende hasta organisadornan

WILLEMSTAD — Curaçao North Sea Jazz Festival 2026 a cuminsa diahuebs anochi cu un apertura cu tabata mucho mas grandi cu probablemente hopi hende a spera pa un prome anochi. Alain Pérez y La Orquesta y Gente de Zona a pone e tono Cubano, mientras e publico a sigui crece durante anochi te cu e tereno a yena cu un publico impresionante.

E anochi a cuminsa den un ambiente relativamente cozy, cu espacio pa move, bebe algo y disfruta e musica. Pero mientras ora tabata pasa, e escenario a cambia. Pa ora Gente de Zona a subi cerca 10’or, miles di persona tabata reuni, creando un ambiente cu a sorprende hasta parti di organisacion. “Nos no a spera asina tanto hende,” un miembro di organisacion a conta Noticiacla diahuebs anochi.

E LINE-UP

E combinacion pa e apertura dificilmente por tabata mas apropia. Alain Pérez, cantante, multi-instrumentalista, compositor y productor Cubano, a habri cu un mezcla energetico di salsa, jazz y flamenco. Pérez, kende a toca cu Irakere di Chucho Valdés y a colabora cu leyendanan manera Paco de Lucía, a trece un sabor autenticamente Cubano na Piscadera.

Despues tabata turno di Gente de Zona, y ey e fiesta a cambia marcha. E duo di Alexander Delgado y Randy Malcom, mundialmente conoci pa hits manera Bailando cu Enrique Iglesias y La Gozadera cu Marc Anthony, a encontra un publico completamente cla pa baila. Y e publico no a keda decepciona pasobra e hitnan ey, aunke cu ausencia di Iglesias y Marc Anthony, asina mes e exitonan ey a zona cu tur e ambiente necesario.  E resultado tabata un final di apertura cu mas tabata parce un anochi principal cu un warmup pa e resto di festival.

Y si diahuebs tabata apenas e cuminsamento, diabierna ta promete un salto ainda mas grandi. E programa oficial ta reuni shete nomber cu ta cubri casi tur generacion y estilo: Rubén Blades cu Roberto Delgado Big Band, Toto, artista Arubiano Jeon, Monty Alexander Jamericana, PJ Morton, Sean Paul y The Jacksons.

Rubén Blades lo trece su salsa cu letra social y su Fotografías Tour, mientras Toto ta carga un catalogo cu classics manera Africa, Rosanna y Hold The Line. Jeon ta representa Aruba y Caribe, mientras Sean Paul ta añadi dancehall, PJ Morton soul, Monty Alexander jazz cu sabor Jamaicano, y The Jacksons un dosis grandi di nostalgia, funk y Motown.

Despues di un diahuebs cu a supera expectativanan, e pregunta pa diabierna ya no ta si Curaçao North Sea Jazz lo yena. E pregunta ta: cuanto mas grandi e fiesta por bira? E show diabierna ta cuminsa pa 7’or.