Aruba ta debuta contra Antigua den Nations League dia 23 september

ORANJESTAD – Concacaf a confirma e calendario di september y october pa e 2026/27 Concacaf Nations League, y Aruba lo cuminsa su campaña dia 23 di September proximo contra Antigua & Barbuda.

Aruba ta den League C, Grupo B, hunto cu Antigua & Barbuda y Anguilla. E formato ta stipula cu cada seleccion lo hunga cuatro partido den e fase di grupo, mientras e tres ganador di grupo y e mihor segundo lugar lo clasifica pa e League C Championship.

E prome partido di Aruba ta dia 23 di september pa 7:00 di anochi contra Antigua & Barbuda na Sir Vivian Richards Stadium, na St. John’s. Despues Aruba lo enfrenta Anguilla dia 29 di september, tambe pa 7:00 di anochi.

Na october, Aruba lo bolbe enfrenta Anguilla dia 4 di october, y lo cerra e bentana contra Antigua & Barbuda dia 6 di october. Tur e partidonan di grupo di Aruba den e bentana aki ta programa na Antigua & Barbuda.

E Nations League aki tin importancia adicional, pasobra e competencia tambe ta sirbi como clasificacion pa Concacaf Gold Cup 2027.

Pa Aruba, e meta ta cla: busca pa domina Grupo B y mantene opcion habri pa avansa den League C y sigui lucha pa un luga den Gold Cup.