Joran van der Sloot ta pidi traslado despues di amenaza di morto den prizon na Peru

LIMA - Joran van der Sloot, condena na Peru pa asesinato y trafico di droga, a pidi pa wordo traslada pa otro prizon, alegando cu otro presonan ta menas’e cu morto.

Segun media Peruano, Van der Sloot a declara den su peticion cu e ta “victima di tortura psicologico casi tur dia” y cu e amenaza contra dje y su famia ta afectando su salud mental.

Actualmente e ta cumpliendo 28 aña di castigo pa asesinato di Stephany Flores y 18 aña adicional pa trafico di droga. E ta cera den prizon Challapalca, situa na 4.600 meter di haltura y conoci pa su condicionnan duro y aislamiento.

Na december a haya Van der Sloot gravemente herida den su cel. Segun prensa Peruano, e tabata un intento pa kita su propio bida.

Van der Sloot ta bisa cu direccion di prizon ya a aproba e traslado, pero ainda falta aprobacion di un hues.

Na Merca, Van der Sloot tambe a haya un castigo di 20 aña. Na 2023 el a admiti cu el a mata Natalee Holloway, pero no a wordo condena pa su asesinato. E confesion tabata parti di un acuerdo den un caso di extorsion contra su mayornan.