Aruba Fashion Week ta celebra 10 aña cu “Winds of Fashion”

ORANJESTAD – Aruba Fashion Week lo celebra su di 10 aniversario cu e edicion 2026, “Winds of Fashion”, di 19 pa 22 di november na Tierra del Sol Aruba.

Durante cuater dia, e evento lo combina moda internacional, luho, lifestyle y bienestar, cu desfile di moda, un fashion showroom di tres dia, Fashion Talks, networking y experiencianan especial. E programa lo culmina diadomingo 22 di november cu un dia dedica na bienestar y estilo di bida Arubiano.

Desde su fundacion na 2016, Aruba Fashion Week a crece den un plataforma internacional cu ta conecta moda, turismo y comercio, mientras ta promove Aruba como destinacion premium den Caribe. E plataforma tambe ta brinda diseñadornan y marcanan oportunidad pa conecta cu cumprado, comerciante y mercado nobo.

Promocion di talento Arubiano ta sigui forma parti importante di e mision. Diseñadornan manera Ronchi de Cuba, Maison Ryon, Andrew Steba, Javan Croes, Gigliola Arendsz, María Teresa Madariaga y Quiana Cronie a participa durante e añanan. Cronie a yega di presenta na New York Fashion Week na 2025 via e plataforma.

JOIA Aruba by Iberostar lo funciona como Official Accommodation Host di e edicion 2026.