Analisis: Arubahuis: rebranding no mester reemplasa un simbolo di Aruba na Hulanda Parti 2

Skirbi pa Tito Laclé

Den Parti 1 nos a mira cu “Arubahuis” no ta simplemente un sobrenomber informal. E ta un nomber cu tin mas di cuatro decenia di reconocimiento, cu ta sigui wordo usa hasta den fuentenan oficial y cu ta conecta directamente cu representacion di Aruba na Hulanda. Awor e pregunta ta bira mas profundo: si meta di e institucion ta aumenta visibilidad di Aruba, ta logico pa pone precisamente e nomber mas reconocibel na banda?

UN CONTRADICCION DEN E PROPIO META DI REBRANDING?

Tin un aspecto cu merece reflexion.

Si e meta di e Kabinet ta precisamente pa haci Aruba mas visibel na Hulanda, como su vision oficial ta indica, e ora elimina un nomber cu literalmente ta pone “Aruba” prominente dilanti por parece contraproductivo. “Arubahuis” ta casi funciona mescos cu “Huis van Europa” of otro institucion cu usa un nomber simpel y identificabel pa crea presencia, y mustra cu tin un autoridad di representacion. Un Hulandes cu tende “Arubahuis” inmediatamente tende “Aruba”. E efecto di marca ta fuerte.

Ademas, Arubahuis ta  simbolo di Status Aparte. Na 2026 Aruba ta celebra 40 aña di Status Aparte. Precisamente den e contexto ey, ta dificil pa separa Arubahuis completamente for di su significado historico.

E representacion na Den Haag a precede Status Aparte y despues di 1986 a bira e oficina di e Minister Plenipotenciario. Esta no ta un empresa comercial cu simplemente ta cambia logo cada cinco aña. E ta un institucion cu ta forma parti di historia constitucional di Aruba. Den branding publico ta existi algo cu por wordo yama ‘memoria institucional’: un nomber ta acumula significado cu paso di tempo. E reconocimento ey tin balor y no ta facil pa reemplasa. E solucion no necesariamente ta un escogencia entre dos. Talbes e mihor opcion no ta: Arubahuis OF Kabinet van Aruba. sino: ARUBAHUIS - Kabinet van de Gevolmachtigde Minister van Aruba.

E prome ta e marca publico, historico y reconocibel. E di dos ta e denominacion institucional y huridico. En realidad, e combinacion di nomber ey ta bastante cerca di con e propio Gobierno Hulandes actualmente ta identifica e organisacion: “Arubahuis”, sigui pa su nomber oficial entre parentesis. Esey ta permiti e modernisacion sin corta e conexion historico.

REBRANDING MESTER AGREGA, NO KITA

No comprondemi malo si. Modernisacion no ta malo. At all!. Institucionan publico mester evoluciona. Nan website, nan comunicacion, nan servicio pa e ciudadano y identidad visual por y mester modernisa. Ata Noticiacla mes a ‘rebrand’ recientemente.  Pero rebranding ta exitoso solamente si e identidad nobo ta mas fuerte cu esun cu e ta reemplasa. Mescos ta pa Noticiacla. Moderno pero ainda reconocible, y no HENTER un otro imagen. Y claro, si E nomber nobo no ta crea confusion. Den caso di Arubahuis, Gobierno ya tin algo cu marketing normalmente ta costa hopi placa pa crea: un nomber cu pueblo conoce, cu tin historia, cu tin identidad nacional y cu directamente ta conecta cu Aruba.

E pregunta e ora no mester ta solamente: “Dicon sigui yam’e Arubahuis?” E pregunta tambe mester ta: “Kico exactamente nos ta gana door di no yam’e Arubahuis mas?” Si e contesta ta solamente cu un nomber nobo ta parce mas moderno of institucional, e beneficio probablemente no ta suficiente pa sacrifica mas di cuatro decenia di reconocimiento.

Arubahuis no ta solamente e cas of oficina unda e Minister Plenipotenciario ta sinta. Arubahuis ta un nomber cu a acompaña Aruba durante su transformacion constitucional, ta representa e isla na Hulanda y ta funciona como un pida di Aruba na Europa. Modernisa e institucion, modernisa e servicio y modernisa su imagen. Pero tin bon argumento pa laga e nomber “Arubahuis” sigui wordo uza pa nos cas leu for di cas. Y sigur pa Noticiacla.