Señora di Corsou a fayece den temblor na Colombia; dos yiu herida

BOGOTA - Un señora di Corsou a perde bida despues cu el a wordo herida gravemente durante e temblor cu a sacudi Colombia dialuna 10 di augustus. Segun informacion publica pa Extra, e señora tabata na aeropuerto internacional Matecaña na Pereira hunto cu su dos yiunan y un nieta, preparando pa biaha via Bogota pa Corsou.

Durante e temblor, parti di concreto a cai riba e señora y causa un herida serio na su cabez. Su yiu homber a kibra un pia, mientras su yiu muhe a kibra ambos pia y su heup. E nieta aparentemente no a resulta herida gravemente.

E dos yiunan a wordo opera inmediatamente, pero nan mama posteriormente a fayece como consecuencia di su heridanan. Famia ta haciendo tramite pa repatria su curpa pa Corsou. E dos yiunan, pa motibo di nan condicion fisico, ainda no por biaha.

SVB Corsou, entretanto, a informa cu tur paciente cu ta actualmente na Colombia pa tratamiento medico ta den bon condicion y cu atencion medico ta sigui normalmente. E instituto ta sigui monitorea situacion y lo tuma medida adicional si ta necesario.