Problema cu iluminacion ta para campeonato di baseball A-Klas y AA

ORANJESTAD – Aruba Baseball Bond Amateur (ABBA) a anuncia cu e campeonato di e categorianan A-Klas y AA no por cuminsa y ta wordo cancela temporalmente pasobra e sistema di iluminacion na Stadion Nadi Croes/Crisimo Angela actualmente no ta funciona.

Segun ABBA, e organisacion a busca diferente alternativa pa por cuminsa e campeonato, pero no a logra haya e cooperacion necesario di tur e teamnan y otro partidonan involvi.

Como resultado, ABBA ta bisa cu no a keda otro opcion cu suspende e campeonato te ora cu e problema por wordo resolve.

Den su comunicado, ABBA a expresa su decepcion pa e consecuencia cu e decision lo tin pa hungadornan, directivanan, fanaticonan y tur persona involvi den baseball. E organisacion tambe a critica e hecho cu otro actividadnan durante fin di siman ta haya mas prioridad y apoyo, mientras cu e categorianan AA y A-Klas no ta ricibi e mesun nivel di atencion.

ABBA a reafirma su compromiso cu desaroyo y promocion di baseball na Aruba y a indica cu lo sigui busca solucionnan pa reanuda e campeonato mas pronto cu ta posible.