Baby recien naci ta haya yudansa urgente despues di parto na cas

ORANJESTAD – Un baby recien naci a wordo transporta cu urgencia pa hospital diaranson atardi despues cu e la nace na un cas na Caya Frere Fredericus y a presenta señalnan cu e mester atencion medico inmediato.

Segun informacion di Cuerpo Policial Aruba, Central di Polis a ricibi un yamada di Alarm Central rond di 6:58 p.m., informando cu un señora a duna luz na cas y cu e baby no tabata reacciona.

Ora polis a yega na e sitio, personal di ambulance a pidi asistencia pa cera caminda y facilita un transporte cu maximo urgencia pa hospital. Cu coordinacion di Central di Polis, diferente unidadnan a yuda pa habri e ruta, permitiendo cu e ambulance por yega hospital di un manera rapido y sigur.

Tanto e baby como e mama a wordo transporta pa haya cuido medico specialisa. Cuerpo Policial Aruba a expresa su deseo pa un pronto recuperacion di ambos.