AAA: Aruba a amplia su red di buelonan den 2025

ORANJESTAD – Aruba Airport Authority (AAA) ta bisa cu e red di buelonan di Aruba a sigui expande durante 2025, cu mas frecuencia, mas capacidad y nobo conexionnan cu Merca, Latinoamerica, Europa y Caribe. Segun AAA, e demanda pa biaha pa Aruba a supera e nivelnan di 2019 y a supera tambe e resultadonan registra den 2024.

LATINO AMERICA

Den Latinoamerica, LATAM a aumenta su cantidad di buelo pa cinco pa siman, mientras Aerolíneas Argentinas a habri conexionnan cu tres aeropuerto na Argentina. Copa Airlines tambe a añade tres buelo nocturno diario entre Panama City y Aruba, mehorando conexionnan cu Merca y Latinoamerica.

MERCA

Den Merca, varios aerolineanan a amplia nan servicio. Delta a aumenta frecuencia pa Atlanta y New York, United a amplia su ruta Houston pa operacion diario durante temporada pico, JetBlue a aumenta buelonan pa Boston y New York y a añade mas di 200 buelo adicional pa e temporada di winter. American Airlines, Southwest y Spirit Airlines tambe a aumenta capacidad y frecuencia riba diferente ruta.

EUROPA

Pa Europa, KLM a aumenta su servicio entre Hulanda y Aruba di siete pa nuebe buelo pa siman durante e temporada di winter. Segun AAA, e resultado ta confirma cu Aruba ta sigui fortalece su posicion como un destino importante den Caribe. Pa 2026, e aeropuerto ta spera continua cu un crecimiento sostenibel, enfoca riba mas capacidad y mas frecuencia di buelo.