Reino Hulandes kier mantene poder pa kita nacionalidad di terroristanan

DEN HAAG / ORANJESTAD – Gobierno di Reino Hulandes kier haci permanente e ley cu permiti kita nacionalidad Hulandes di personanan cu ta uni na organizacionnan terrorista den exterior. Asina e portal curacao.nu ta raporta. 

E propuesta di Ley di Reino a wordo manda na parlamentonan di Corsou, Aruba y Sint Maarten, pasobra nacionalidad Hulandes ta un asunto di Reino.

E medida ta aplica pa personanan di 18 aña of mas cu ta den exterior y cu por wordo comproba cu nan a uni na un organizacion terrorista reconoci. No ta necesario un condena penal prome. Sinembargo, e persona mester tin un di dos nacionalidad, ya cu segun tratado internacional nan no por keda sin nacionalidad.

Desde cu e ley temporal a drenta na vigor na 2017, e medida a wordo aplica 25 biaha. Gobierno ta sostene cu e amenaza di terrorismo ainda ta presente y kier mantene e poder despues di 1 di mart 2027.