Aruba ta cla pa e Intermediate World Series na California

ORANJESTAD – E seleccion di Intermediate League Liga Central Braulio Wester, campeon di Latino America, a completa su ultimo entrenamiento diamars atardi na Stadion Nadi Croes/Crismo Angela, prome cu nan biaha pa Estados Unidos.

Durante e ultimo sesion di preparacion, e hungadornan a haci nan ultimo ensayo, mientras cu mayornan a ricibi e ultimo informacion tocante e biahe y participacion di e ekipo. Segun e cuerpo tecnico, e seleccion a sigui un preparacion intensivo den e ultimo simannan, cu te tres sesion di entrenamiento pa dia.

E delegacion lo sali diabierna rumbo pa Livermore, California, unda e lo representa Latino America den e Intermediate League Baseball World Series. Aruba lo habri e torneo contra e ganador entre Asia-Pacific (Corea di Zuid) y Australia. Potret cortesia 297 Sports.