Advocaat no ta cera porta pa keda cu Corsou

WILLEMSTAD – Entrenador nacional di seleccion di Corsou Dick Advocaat no ta descarta un permanencia mas largo cu seleccion di Corsou. E entrenador di 78 aña a declara cu el no ta bisa "no" di antemano, pero cu ainda no ta cla pa tuma un decision, paso Federacion di Futbol di Corsou lo anuncia na principio di augustus ken lo ta e siguiente seleccionador. Asina e la bisa den un entrevista cu e portal Curacao.nu.

Advocaat a bisa cu su motivacion pa sigui den futbol ta ainda hopi grandi y cu el a disfruta hopi di e Mundial, apesar di e grupo dificil cu Corsou a enfrenta. Segun e, e seleccion a laga un bon impresion, specialmente den e partidonan contra Ecuador y Costa di Marfil.

President di Federacion di Futbol di Corsou, Gilbert Martina, tambe no a confirma si Advocaat lo keda. El a indica cu e decision lo wordo anuncia na principio di augustus, paso contrato actual di Advocaat ta termina dia 31 di juli.

E entrenador ta mira futuro cu optimismo y ta kere cu Corsou por sigui fortalece, specialmente si mas hugador cu tin derecho di representa e isla ta uni cu e seleccion.

Advocaat a admiti cu e Mundial tabata un experiencia emocional, principalmente door di e alegria cu e pueblo di Corsou a demonstra. Apesar di su edad, e ta bisa cu su condicion fisico ta excelente.

Finalmente, e a laga cla cu si e sigui como entrenador, esey lo ta cu Corsou. "Si ainda tin algo pa mi haci, lo ta na Corsou. Si no, no tin otro aventura," Advocaat a bisa.