Mike Eman: Voluntarionan di Aruba ta enfrenta un reto humanitario sin precedente”

ORANJESTAD – Prome Minister Mike Eman a confirma cu Aruba a cuminza oficialmente cu su mision humanitario pa Venezuela. Diadomingo mainta, e prome delegacion di voluntario di Cruz Cora Aruba y dos specialista di Crisis Management Organisation (CMO) a sali rumbo pa Venezuela pa prepara e tereno pa e siguiente fase di asistencia.

Segun Eman, e grupo cu a sali awor ta haci un "biahe di avance". Nan mision principal ta evalua e situacion riba tereno y coordina cu Cruz Cora Venezuela exactamente cua tipo di asistencia medico y logistico ta mas urgente.

"Nos kier manda loke realmente ta necesario," Eman a bisa. "E preparacion cu nan ta haci awor lo permiti cu e siguiente ekipo medico di Aruba por yega bon prepara pa cuminsa traha mesora."

E prome minister a describi e situacion den Venezuela como un reto humanitario di gran magnitud. Basando su mes riba imagennan y informacion cu Gobierno ta ricibi constantemente for di Embahadora di Reino Hulandes na Venezuela, señora González, el a bisa cu e necesidadnan ta enorme.

"Ta un situacion critico. Nos ta aprecia enormemente cu e voluntarionan di Cruz Cora y CMO a ofrece nan mes pa bai y traha den circunstancianan tan dificil."

EXPERIENCIA DEN HAITI TA YUDA PREPARA E MISION

Segun Eman, diferente miembro di e delegacion ya tin experiencia den desastrenan natural. Dos di nan anteriormente a participa den misionnan humanitario na Haiti, unda nan a haya experiencia cu trabou den area destrui, sin coriente, awa of facilidadnan basico.

"E experiencia ey ta hopi importante," el a bisa. "Nan a comparti cu e otro voluntarionan kiko nan por spera. No ta un trabou facil; bo por keda aislá durante varios dia y traha den circunstancianan hopi dificil."

EQUIPO MEDICO Y HOSPITAL 

Durante e siguiente dianan, Aruba lo sigui amplia su asistencia. Eman a confirma cu e proximo misionnan lo inclui un equipo completo di ciruhano, medico, enfermero y otro especialista.

E equipo medico ta wordo coordina door di Rubén Croes, kende ta finalisando e composicion di e grupo. Entre e profesionalnan tin especialista den anestesia y cirugia cu anteriormente tambe a traha na Haiti, unda nan a trata hopi paciente cu fracturanan y otro heridanan grave.

Ademas, Aruba ta preparando un hospital di campo, cu por brinda atencion medico den e area afecta. CMO tambe tin sistema pa transporte di awa y otro facilidadnan logistico cu por wordo desplasa si e situacion ta requeri.

EMBAHADORA HULANDES LO RICIBI DELEGACION DI ARUBA

Prome Minister a enfatisa e papel importante cu Embahadora González di Reino Hulandes na Venezuela ta desempeña den e coordinacion.

"Nos tin contacto intensivo cu e embahadora tur dia. Awe mes mi a papia cu ne. E mes lo bai aeropuerto pa ricibi e delegacion di Aruba."

Segun Eman, den un pais cu ta den medio di un desastre natural, hopi biaha tin confusion y obstaculonan administrativo. Door di ricibi e grupo personalmente, e embahadora por yuda acelera e proceso pa nan por cuminza nan trabou cuanto promé.

MAS VOLUNTARIO TA CLA PA SALI

Eman a indica cu otro voluntario di Cruz Cora ya ta den fase final di preparacion y por sali den e siguiente dianan, dependiendo di e necesidadnan cu e prome grupo ta identifica riba tereno.

Gobierno tambe ta considera posibilidad di brinda apoyo adicional cu otro instancia di Reino Hulandes. Un di e opcionnan ta desplasa un equipo di Arumil, pero pa esey ainda ta falta e autorizacion necesario, considerando cu e personal militar ta carga arma y e situacion legal ta mas complejo.

ENFOKE TA AWOR RIBA YUDANSA INMEDIATO

En relacion cu diferente accionnan di recaudacion di fondo cu ciudadanonan y organizacionnan particular a cuminza, Eman a expresa su aprecio pa tur iniciativa di solidaridad.

El a bisa cu Gobierno ainda no tin un balor completo di e donacionnan, ni a tuma decision riba un posible teleton nacional, manera a sosode den desastrenan anterior.

"Pa momento, nos prioridad absoluto ta e asistencia humanitario y e yudansa inmediato na e victimanan. E otro accionnan por sigui despues," Prome Minister Mike Eman a conclui.