CMO: Aruba a prepara un mision cu experto pa brinda yudansa efectivo na Venezuela

ORANJESTAD – Desde e momento cu e fuerte temblornan a sacudi Venezuela, Crisis Management Organisation (CMO) a activa su protocolonan di respuesta pa desastrenan y a cuminza cu preparacionnan pa yuda e pais vecino. Esaki hefe di CMO, Rino Hermans, a confirma diadomingo mainta den un entrevista unda el a splica con e mision humanitario di Aruba a wordo organiza.

Segun Hermans, despues di evalua e situacion, a tuma decision pa manda un prome ekipo cu tin como tarea principal prepara e logistica riba tereno. Esaki ta permiti cu e siguiente gruponan, forma pa ciruhano, medico, enfermero y otro experto medico cu Aruba lo ofrece, por cuminsa nan trabou inmediatamente ora nan yega.

"E prome ekipo ta enfoca riba logistica," Hermans a splica. "Cruz Cora Aruba ta encarga di coordina e aspectonan practico, manera e tipo di medicina cu ya tin disponibel na Venezuela y cua suministro mester sali for di Aruba. Nos no kier hiba cosnan cu ya tin aya; nos kier hiba exactamente loke ta falta."

Den e prome buelo ta biaha dos especialista certifica pa operacionnan den zonanan di desastre. Un lo ta responsable pa seguridad di e base camp, mientras cu e otro ta encarga di e coordinacion logistico. Tur dos a sigui entrenamentonan especializado na Hulanda y tin certificacion internacional pa traha den circunstancianan di emergencia.

Segun Hermans, e informacion cu nan lo reuni riba tereno lo ta esencial pa completa e preparacion di dos otro buelo cu ta programa pa e otro siman. "Na momento cu nan manda e informacion bek Aruba, nos por prepara e siguiente misionnan cu exactamente loke ta mester, sin hiba demasiado of demasiado poco."

E hefe di CMO a indica cu e siguiente equiponan lo consisti principalmente di ciruhano, medico y enfermero cu ya ta prepara pa traha den circunstancianan di emergencia. Nan lo por brinda asistencia medico inmediato, incluyendo Basic Life Support, na e victimanan.

Hermans a splica cu e fase critico di buskeda y rescate durante e prome 72 ora despues di un desastre ta practicamente pasa caba. Awor e operacion ta drenta den e asina yama fase di relief, cu ta enfoca riba sosten di e poblacion afecta, asistencia medico y recuperacion.

"Awor ta importante pa sa exactamente kiko tin falta. Asina nos por coordina cu e operacionnan di rescate y brinda asistencia cu realmente ta aporta valor," el a bisa.

Ademas di e apoyo medico, Aruba tambe ta manda un experto den geologia pa haci reconocemento di e area y evalua e situacion riba tereno. E informacion ey lo yuda determina con e siguiente misionnan mester wordo organiza.

Pa Hermans, e operacion ta mustra cu Aruba, apesar di su tamaño, tin capacidad pa reacciona rapidamente na situacionnan internacional.

"Nos ta sigui entrenando nos hende y fortaleciendo nos organizacion. Awe nos ta mira e resultado di e inversion ey. Aruba ta un pais chikito, pero cu hopi capacidad. Nos por haci evaluacionnan rapido y brinda sosten na momento cu mas tin necesidad," asina Hermans a conclui.