Crucero e ta kita Aruba for di su itinerario pa 2027 debi na disponibilidad di haf

ORANJESTAD – Norwegian Cruise Line a confirma cu Aruba lo no ta forma parti di un di su cruceronan den Caribe na cuminsamento di 2027, despues cu e compania a informa cu e haf di Oranjestad no tabata disponibel.

E cambio ta afecta e crucero Norwegian Prima, cu lo sali for di San Juan, Puerto Rico, dia 31 di januari 2027 pa un crucero di siete anochi den Caribe.

Segun e itinerario original, e bapor, cu por acomoda 3.195 pasahero, tabata programa pa yega Oranjestad dia 3 di februari. E bishita ey, sinembargo, a wordo cancela y remplasa cu un escala na Philipsburg, St. Maarten.

Den un comunicado manda na pasaheronan, Norwegian Cruise Line a bisa cu e cambio tabata necesario despues di un actualisacion den disponibilidad di haf.

"Como parti di nos compromiso pa entrega un experiencia fluido y di calidad, nos a haci un ajuste den e itinerario debido na un actualisacion den disponibilidad di haf," segun e compania.

Norwegian a bisa cu, aunke e ta coordina cu autoridadnan di haf hopi tempu di antemano, circunstancianan operacional por cambia y espacio previamente confirma por no keda disponibel.

E compania no a revela kiko exactamente a causa cu Aruba no tabata disponibel. Situacionnan asina por resulta di congestion di bapor, conflicto di programacion, trabounan di mantencion of proyecto di construccion.

Actualmente, e terminal di crucero di Aruba ta pasando door di un proyecto grandi di modernisacion y renovacion di e waterfront, cu lo dura varios aña. Aunke operacionnan di crucero ta sigui normalmente, algun fase di e proyecto por afecta disponibilidad di luganan di atraque.

Dia na lama prome cu St. Maarten

Cu e itinerario nobo, 3 di februari lo bira un dia completo na lama. E siguiente dia, cu originalmente tabata un dia na lama, e Norwegian Prima lo bishita Philipsburg, St. Maarten, entre 7:00 di mainta te 5:00 di atardi.

E resto di e itinerario ta keda mescos, cu escalanan na:

Willemstad, Corsou

St. Thomas, Islanan Virgin di Merka

Tortola, Islanan Virgin Britanico

Segun e programacion actual, Norwegian Prima lo no regresa Aruba te 11 di mart 2027.

No tin compensacion anuncia

Te awor, Norwegian Cruise Line no a anuncia ningun compensacion pa pasaheronan afecta pa e cambio den itinerario.

Segun e condicionnan di e contrato di crucero, e compania tin e derecho di cambia itinerarionan pa motibonan operacional sin obligacion di paga compensacion.

Excursionnan cu pasaheronan tabatin reserva pa Aruba lo wordo cancela automaticamente y e placa lo wordo devolvi.

Pasaheronan cu no ta satisfecho cu e cambio ainda por cancela nan crucero sin multa, semper cu nan haci esey dentro di e termino di cancelacion estableci door di Norwegian Cruise Line. Actualmente ainda tin mas cu siete luna prome cu e salida di e crucero.