Problemanan tecnico no a stop Verstappen na Austria durante practica di F1

SPIELBERG – Max Verstappen a cuminsa e fin di siman di Formula 1 na Austria cu bastante problema. E piloto di Red Bull Racing a keda para dos biaha mientras e tabata saliendo for di pitlane durante e prome sesion di practica. Pesei, e campeon mundial a logra recupera y termina cu e cuater tempo mas rapido. E dos piloto di Mercedes tabata e mas liher den e sesion. Tabatin hopi speransa pa Red Bull Racing den nan carrera di cas, pasobra e team a yega na Red Bull Ring cu un gran pakete di mehoracionnan pa e auto. Sinembargo, e fin di siman no a cuminza manera spera. Na e prome intento pa sali di pitlane, Verstappen su auto a para por completo y mester a wordo hiba bek pa garage. Esaki a duna e mecaniconan mas trabou, ya cu auto di Isack Hadjar tambe tabata den pitbox cu problemanan tecnico. Dies minuut despues, Verstappen a purba sali un biaha mas, pero despues di solamente algun metro e auto a para atrobe. E cuatro biaha campeon mundial a mustra claramente su frustracion sacudiendo su cabez. Despues di casi binti minuut di sesion, Verstappen finalmente a logra sali riba pista. Cu su prome vuelta mesora, el a registra e di tres mihor tempo.

AINDA NO TA SATISFECHO CU E AUTO

Verstappen a bisa cu ainda e no tabata completamente contento cu e maneho di su auto. E  tabatin dificultad pa haya suficiente grip riba pista, pero finalmente a logra termina cu e cuater mihor tempo. Su tempo tabata 0.281 seconde mas slow cu e buelta mas rapido, registra pa Kimi Antonelli di Mercedes. Isack Hadjar a sali riba pista despues di mitar di e sesion y a termina cu e di diesdos tempo.

MERCEDES DOMINA E SESION

Kimi Antonelli y George Russell a domina e prome practica for di cuminsamento te final. Antonelli a keda cu e mihor vuelta, mientras Russell a termina solamente cuatro centesimo di segundo detras di su compañero di team. Oscar Piastri di McLaren a registra e di tres tempo, mas di un diesimo di segundo mas lento cu Antonelli. Pa Lando Norris, e sesion a bira un decepcion. E campeon mundial actual a perde casi henter e practica debido na un fuga den e sistema hidraulico di su auto. Solamente na e ultimo momentonan el a logra sali riba pista y a termina cu e di siete tempo.

FERRARI CU MEHORACIONNAN

Ferrari tambe a yega na Austria cu un motor actualisa. Charles Leclerc ainda no por a pone e mehoracionnan na prueba, pasobra novato Dino Beganovic a ocupa su asiento durante e prome practica. Lewis Hamilton si a participa den e sesion y a termina cu e di cinco tempo. E shete biaha campeon mundial a gana su prome carrera cu Ferrari dos siman pasa na Barcelona. E sesion a termina cu bandera cora despues cu e Cadillac di Sergio Pérez a keda para riba pista. E di dos sesion di practica liber ta programa pa diabierna pa 5:00 di atardi (ora di Austria), mientras e Gran Premio di Austria lo wordo corre dia diadomingo pa 3:00 di atardi ora di Austria,  10 or di mainta ora di Aruba.

PROTOCOL  PA CALOR EXTREMO

Debi  na e temperatura halto cu ta pronostica pa e fin di siman, FIA a activa un protocolo special pa calor. Segun e regla nobo, e teamnan mester instala un sistema di enfriamento den e autonan. E pilotonan por scoge si nan kier usa un vest di enfriamento. Verstappen a declara diahuebs cu, pa su parti, e no tin intencion di usa e vest durante e carrera.