Advocaat orguyoso apesar di eliminacion: “Nos a competi cu un di e mihor seleccionnan di mundo”

PHILADELPHIA – Apesar di e decepcion despues di e derrota 2-0 contra Costa di Marfil y e eliminacion di Corsou for di Mundial 2026, entrenador principal Dick Advocaat a sali di e stadion cu un sentimiento di orguyo. Segun e, su ekipo a mustra cu por competi cu e mihor paisnan di futbol na mundo.= “Nos a competi cu un berdadero potencia mundial. Nos no a hunga cu miedo ni cu modestia. Defensivamente y ofensivamente nos a participa den e partido. Loke a falta ta cu den un di e oportunidadnan cu nos a crea, e bala mester a drenta. Nan a haci esey, nos no. Esaki ta e gran diferencia,” a bisa Advocaat despues di e encuentro. E entrenador hulandes a indica cu, apesar di e prestacion positivo, ainda tin aspectonan cu mester mehora. Segun  e, Corsou mester fortalece algun posicionnan pa logra hunga cu mas facilidad. “Tin algun posicion cu nos mester reforza. Si nos logra haya e hendenan correcto, nos lo por hunga cu mas comodidad. Awor nos mester traha hopi duro pa logra cada resultado,” el a bisa.

ORGUYO PA UN MUNDIAL HISTORICO

Ora a mira bek riba tur e campaña mundialista, Advocaat a bisa cu e sentimiento cu ta domina ta orgullo. “Ora nos a cuminza e proyecto, nos meta tabata clasifica pa Mundial. Nos a logra esey. Y si bo mira con e hobenan aki a enfrenta tres seleccion mundialista, nan por ta hopi orguyoso di nan mes. Nan a haci un trabou extraordinario.”

FUTURO AINDA NO TA DEFINI

Riba pregunta tocante su futuro como entrenador di Corsou, Advocaat a bisa cu ainda e no a pensa riba esey. “No un solo minuut mi a pensa riba mi futuro. Mi concentracion tabata completamente riba e partido y riba con nos por tabata hunga mihor.” E entrenador tambe a tuma e momento pa expresa su aprecio pa su cuerpo tecnico, cual el a describi como un grupo cu “a haci un trabou excelente” durante tur e campaña cu a culmina cu e prome participacion historico di Corsou na un Copa Mundial.