Hulanda ta vence Tunesia 3-1 y ta termina como lider di grupo

KANSAS CITY - E seleccion nacional di Hulanda a logra un victoria di 3-1 contra Tunesia y ta sigui den Mundial como lider di su grupo. Despues di un coumienso perfecto, e preshon a baha hopi liher. Awor, Hulanda lo enfrenta Moroco dialuna anochi, den ronda di e ultimo 32.

Den su partido number 63 como entrenador nacional, mesun cantidad cu Louis van Gaal, Ronald Koeman a scoge Nathan Aké como back robes y Donyell Malen como extremo drechi. Micky van de Ven y Crysencio Summerville no a cuminza pa motibo cu nan tabatin un carchi hel y tabata den peligro di wordo suspendi.

Promer cu e partido, tabatin mal tempu serio cu strena y lamper, y nubianan preto riba Kansas City. Pa un rato tabata insigur  si e encuentro lo por a cuminza na ora, pero hustamente na tempo e clima a mehora.

Poco a falta pa Tunesia habri e score. Ismaël Gharbi a haya un bon oportunidad cu cabes, pero su cabesaso a pasa ariba di e arco. Un minuut despues, Hulanda a castiga Tunesia.

Den minuut 3, un pase perfecto di Donyell Malen pa Denzel Dumfries a termina cu un centro cu defensor Hazem Mastouri inadvertidamente a manda den su mesun porteria. E gol aki, marca despues di 2 minuut y 21 seconde, ta e di dos gol mas lihe den historia di Hulanda na Mundial, solamente supera pa e penal legendario di Johan Neeskens den final di 1974 contra Alemania.

Na minuut 7, Hulanda a doble e bentaha. Virgil van Dijk a cabecea e bala dilanti di e arco y Brian Brobbey a remata fuerte pa 2-0. Esaki tabata su di tres gol den e Mundial y su di cuatro gol den e ultimo cuatro partido cu el a cuminza como titular pa Hulanda.

Despues di e comienso explosivo, Hulanda a baha su nivel un tiki  . Cody Gakpo no a logra aprobecha un excelente centro di Malen y Ryan Gravenberch a manda un tiro hopi ariba di e arco. Aun asina, Hulanda a crea 12 intento na prome mitar, e cantidad mas halto desde Mundial 1998, aunque solamente dos a termina den gol. Tunesia, entretanto, a sigui peligroso cu contraataque.

Den di dos mitar, e "Aguilanan di Cartago", cu anteriormente a perde 4-0 contra Japon y 5-1 contra Suecia, a logra pone preshon di nobo. Hazem Mastouri, cu anteriormente a marca den su mesun porteria, a cabecea un corner pa haci 2-1.

E emocion no a dura hopi. Jan Paul van Hecke a marca su promé gol internacional cu un cabezaso despues di un corner, restaurando e diferencia di dos gol: 3-1. Na mesun momento, Suecia a empata contra Hapon, loke a fortalece Hulanda su posicion como lider di grupo.

Tijjani Reijnders tabatin e oportunidad pa pone 4-1, pero su tiro a dal e palo. Ronald Koeman despues a haci varios cambio, a duna Justin Kluivert su promé minuutnan den un Mundial. Teun Koopmeiners, Crysencio Summerville y Memphis Depay tambe a drenta den partido.

Cu su participacion, Memphis Depay a yega na 112 partido internacional, igualando Frank de Boer como e di tres hunga cu mas partido pa Hulanda. E maximo goleador di tur tempu no a logra celebra e hit cu un gol, apesar di cu Hulanda ainda a crea varios oportunidad, incluyendo un bon accion y centro di suplente Noa Lang.