Corsou su soño ta yega su fin pero ta laga bon impresion atras na mundial 2026!

PHILADELPHIA – Corsou a perde 2-0 contra Costa di Marfil den su ultimo partido di Grupo E na Mundial FIFA 2026, pero e seleccion a mustra caracter y disciplina durante hopi parti di e encuentro. Costa di Marfil a logra cualifica pa ronda di 32 despues di e victoria. Cu e derota aki, Corsou su soño ta yega na un final, aunke nan a impresiona grandemente durante e mundial. 

PROME GOL

E africanonan a habri e score caba na minuut 7 ora Nicolas Pepe a aprobecha un pashon perdi den defensa di Corsou pa pone e wega 1-0. Apesar di e gol tempran, e ekipo di entrenador Dick Advocaat no a kibra y a sigui hunga cu confianza, creando varios momento peligroso.

Na cuminzo di e partido, Tahith Chong a pone e goalkeeper di Costa di Marfil yen di trabou cu un tiro for di area. Mas laat, Leandro Bacuna, Jurien Gaari y Tahith Chong tambe a busca e empate, pero sin exito.

Den di dos mitar, Corsou a sali cu mas energia. Sherel Floranus a manda un tiro apenas ariba di e palo, mientras cu e ekipo tabata tene mas posesion di bala y tabata busca e pase decisivo. Sinembargo, na minuut 64, Nicolas Pepe a haci su di dos gol despues di un bon asistencia di Ibrahim Sangare, pone e score 2-0.

CORSOU NO A BAHA CABEZ 

Corsou no a laga su cabes baha y a sigui ataka. Tahith Chong, Leandro Bacuna, Juninho Bacuna, Jeremy Antonisse y Gervane Kastaneer tur a purba vence e goalkeeper contrario, pero e gol nunca a yega. Na otro banda, goalkeeper Eloy Room a sigui confirma su gran torneo cu varios salbamento espectacular, incluyendo un ataha importante na e ultimo minuutnan contra Elye Wahi.

Costa di Marfil, cu e resultado aki, ta logra pasa pa e siguiente ronda di Mundial pa e prome biaha den su historia. Corsou, apesar di e eliminacion, ta cera su participacion cu e cabez na halto despues di a pone dilanti un presentacion fuerte contra Ecuador y mustra cu e por competi contra seleccionnan di nivel mundial.