Motorciclista ta bira e di 8 morto di trafico pa 2026

ORANJESTAD - Diahuebs pa 12:57 di merdia, Central di Polis a ricibi un notificacion di un accidente di trafico entre un auto Hyundai blanco y un brommer Suzuki Hayabusa blanco riba Green Corridor, den direccion di e rotonde di Pos Chikito rumbo pa Oranjestad.

Segun e informacion inicial, e conductor di e brommer no tabata ta reacciona. Polis y ambulance a wordo despacha cu maximo urgencia pa e sitio.

Ora polis a yega, nan a confirma cu e conductor di e brommer tabata inconsciente y sin señal di bida. Personal di ambulance a brinda e victima asistencia medico inmediato, pero desgraciadamente no tabatin nada mas cu nan por a haci pa salba su bida.

Dokter Forensico a yega na e sitio y a confirma e fayecimento di Jeanemarc van der Biezen, naci na Aruba riba 27 di januari 1994, cu tabatin 32 aña di edad.

Specialistanan di Trafico y Polis Technico a haci nan investigacion pa determina con e accidente a sosode.

Departamento di Slachtofferhulp tambe a presenta na e sitio pa brinda apoyo na famia y conocidonan di e victima.

Cu e fayecimento aki, e cantidad di personanan cu a perde nan bida den accidente di trafico na Aruba durante e aña aki a subi pa ocho.

Cuerpo Policial Aruba a expresa su sincero condolencia na famia y sernan keri di e fayecido.