Eman: “Aruba ta cla pa brinda yudansa humanitario na Venezuela”

ORANJESTAD – Prome Minister Mike Eman a expresa su profundo solidaridad cu pueblo di Venezuela despues di e dos temblornan devastador cu a sacudi e pais diabierna anochi. Durante un conferencia di prensa diahuebs mainta, Eman a confirma cu Aruba a activa su contacto cu diferente instancia di Reino Hulandes pa prepara asistencia humanitario, mientras cu e cantidad di victima ta sigui subi.

BOLUNTAD PA YUDA

“Aruba tambe a expresa su boluntad pa yuda den cualkier forma cu ta posibel cu asistencia humanitario. Mi a drenta inmediatamente den contacto cu nos forzanan di Reino, y nan rapidamente a pone nan mes disponibel pa brinda asistencia na Venezuela,” Eman a declara. Segun e Prome Minister, e situacion mas grave ta concentra den La Guaira y rond di Aeropuerto Internacional di Maiquetía, cual a keda seriamente afecta y a wordo sera. Na momento di su declaracion, e cifra preliminar cu gobierno tabata maneha tabata di aproximadamente 70 morto y mas cu 600 herido, aunke Eman a adverti cu e cantidad di victima probablemente lo sigui aumenta. “Conforme tempo ta pasa, e cantidad di personanan cu ainda no tin informacion di nan destino ta aumentando, y esey ta un motibo serio di preocupacion,” el a bisa.

“SEARCH AND RESCUE” TA CRUCIAL

Eman a enfatisa cu e siguiente 48 ora lo ta decisivo pa logra rescata sobrevivientenan cu por ta tranca bou di e edificionan cu a cay. “E imagennan ta mustra cu hopi edificio grandi a cay. Awor e tarea principal ta rescata personanan cu posiblemente ta bou di e derrumbenan. Pa esey ta crucial tin ekiponan profesional di search and rescue,” segun e Prome Minister. Aruba, segun Eman, tin experiencia cu situacionnan asina despues di e gran terremoto di Haití na 2010, ora Reino Hulandes a participa activamente den operacionnan di rescate. “Hulanda tin un equipo di rescate hopi prepara pa busca sobrevivientenan den edificio colapsa, y nos tin experiencia trahando hunto cu nan den situacionnan similar,” el a bisa.

EMBAHADORA NA CARACAS TAMBE A SINTI E IMPACTO

Durante madruga, Eman tambe a mantene contacto cu embahadora di Reino Hulandes na Caracas, Carmen Gonzálvez, kende tabata den e Embahada ora e terremoto a ocuri. “Ora mi papia cu ne durante madruga, e tabata ainda den shock. E tabata riba piso diesdos ora e temblor a sacudi e edificio. Nan no por a usa lift y mester a baha e trapi di emergencia,” Eman a relata. Segun e Prome Minister, e embahada a confirma posteriormente cu tur empleado ta sano y salvo, aunque dos di nan a perde nan cas durante e desastre.

INFORME DI ARUBIANO AFECTA, PERO PREOCUPACION TA SIGUI

Eman a informa cu, te na e momento, no tabatin confirmacion cu algun Arubiano a wordo afecta pa e terremotonan, pero cu gobierno ta sigui monitorea e situacion di cerca. “Esaki no kiermen cu no por tin ciudadano di Aruba afecta. E situacion ta cambia constantemente y nos ta sigui verifica tur informacion cu ta yega for di Venezuela,” e la splica. Gobierno a publica diferente numeronan di contacto pa habitantenan cu tin famia of conocinan na Venezuela. Habitantenan di nacionalidad Hulandes por tuma contacto cu CMO via 588-0100, mientras cu Departamento di Asuntonan Exterior ta atendiendo otro consultanan na 583-4705. Tambe por tuma contacto directamente cu Embahada di Reino Hulandes na Caracas.

SOLIDARIDAD CU COMUNIDAD VENEZOLANA

E Prome Minister a dedica un parti importante di su mensahe na e comunidad venezolana cu ta biba na Aruba.  “Mi solamente por imagina con hopi angustia famianan venezolano na Aruba mester ta pasando den e momentonan aki. Nos kier expresa nos solidaridad cu nan y cu tur pueblo di Venezuela,” Eman a declara. E la agrega cu Aruba tambe a ofrece su espacio aereo pa facilita cualkier operacion di rescate of asistencia humanitario cu Reino Hulandes mester organisa. “Aruba  tei pa yuda unda cu nos por. Nos a comunica cu si ekiponan di rescate hulandes mester usa Aruba como punto logistico pa yudansa humanitario, nos ta cla pa ofrece e apoyo ey inmediatamente,” segun e Prome Minister.

HABRI FRONTERA

Finalmente, Eman a bisa cu, apesar cu gobierno tabata den proceso pa reabri e conexion aereo regular cu Venezuela dia 1 di augustus, e situacion actual lo obliga autoridadnan pa reevalua e plan ey conforme e condicionnan den Aeropuerto di Maiquetía. “Nos ta sigui e situacion ora pa ora. E prioridad awor ta salba bida y brinda yudansa na pueblo venezolano den e momento dificil aki,” Eman a conclui.