Corsou y Aruba ta firma acuerdo pa fortalece turismo, seguridad y conectividad

ORANJESTAD - Corsou y Aruba a firma un acuerdo di cooperacion pa traha mas cerca den area di turismo, seguridad y transporte. E acuerdo a wordo firma door di Minister di Desaroyo Economico di Corsou, Roderick Middelhof, y Minister di Turismo di Aruba, Wendrick Cicilia.

E meta principal ta pa mehora conectividad aereo y maritimo entre e dos islanan, di forma cu biahe entre Aruba y Corsou bira mas facil y cu esaki por crea mas oportunidad pa turismo y economia.

E acuerdo tambe ta inclui cooperacion mas fuerte den seguridad di bishitantenan. E dos gobiernonan kier traha hunto pa mantene Caribe Hulandes como un destinacion sigur y atractivo.

Un otro punto importante ta un strategia internacional di marketing, caminda Aruba y Corsou lo promove nan mes hunto como destinacion combina. E idea ta pa atrae turista pa bishita ambos isla den un solo biahe, mientras cada isla ta conserva su identidad, cultura y caracter unico.

Segun e ministernan, e cooperacion aki lo fortalece posicion internacional di Aruba y Corsou den un mercado turistico cu ta bira cada bes mas competitivo.

Mas detaye tocante e implementacion y proyectonan specifico lo wordo anuncia den e proximonan luna.