Mas di 600 mucha a briya den concierto di Leerorkest Aruba

ORANJESTAD – Mas di 600 mucha di seis scol diferente a subi stage dialuna mainta na Renaissance Convention Center durante e concierto anual di Leerorkest Aruba. E evento a mustra e talento musical, dedicacion y progreso cu cientenan di mucha a desaroya durante e ultimo aña escolar.

Actualmente, Leerorkest Aruba ta atende aproximadamente 620 mucha den su programa escolar y otro 100 mucha den actividadnan despues di scol. E iniciativa ta brinda acceso na enseñansa musical na centenares di mucha na Aruba, permitiendo nan conoce y aprende toca diferente instrumento musical.

Juliette van Romondt, coordinador di Leerorkest Aruba, a expresa su satisfaccion cu e resultado di e concierto. Segun dje, e evento a transcurri cu exito y a mustra claramente e compromiso di e muchanan, docentenan y voluntarionan cu ta forma parti di e programa.

“Mi ta hopi orguyoso di e muchanan y di tur persona cu a contribui pa haci e proyecto aki un exito. Nos a haya sosten di comunidad y di diferente sponsor, loke a permiti cu nos por organiza un evento di e magnitud aki,” Van Romondt a comenta.

Entre e scolnan participante tabatin St. Paulus School, cu a participa cu mas di 150 alumno for di klas 3 te cu klas 6. Docente Eltienne Yarzagaray a expresa su orguyo pa e prestacion di e alumnonan.

“Pa hopi di e muchanan, esaki tabata nan prome experiencia cu un instrumento musical. Programa manera Leerorkest ta brinda nan oportunidad pa descubri talento nobo, desaroya disciplina y aumenta nan confiansa propio. Musica y arte por hunga un rol importante den desaroyo personal di un mucha,” Yarzagaray a indica.

Director musical Patrick de Heus a destaca e energia y entusiasmo cu tabata visibel durante e concierto. Segun e, e resultado final a supera expectativa.

“Nos a mira muchanan contento, docente contento, mayornan orguyoso y famianan emociona. E cooperacion entre e muchanan y e entusiasmo cu nan a mustra riba stage ta confirma e balor di e programa. Musica ta uni hende y ta siña muchanan trabou den ekipo, responsabilidad y perseverancia,” De Heus a splica.

E presentacion a culmina cu un concierto conhunto unda tur e participante nan a toca hunto, creando un momento special cu a provoca un aplauso largo di e publico presente.

Leerorkest Aruba ta continua siendo un ehempel di con inversion den educacion musical por contribui na desaroyo di talento, creatividad, disciplina y colaboracion entre hobennan, mientras cu ta ofrece nan oportunidad unico pa crece tanto personal como artisticamente.