Ombudsman: Mas privacidad y sensibilidad ora di publica resultado di examen

ORANJESTAD – Ombudsman di Aruba, den su rol temporario como Kinderombudsman, a expresa preocupacion serio tocante e manera cu algun scolnan secundario na Aruba ta anuncia resultado di examen final. Segun un carta di preocupacion publica emiti dia 18 di juni, tin scolnan cu ta publica no solamente e nomber di studiantenan cu a slaag, pero tambe di esnan cu no a logra slaag. Segun Ombudsman, e practica aki por expone muchanan innecesariamente na critica publico, presion emocional y hasta stigmatisacion, specialmente den un tempo unda informacion ta circula rapidamente riba rednan social. Aunque e celebracion di resultado di examen a bira un tradicion importante den Aruba, Ombudsman ta señala cu e interes y bienestar di mucha mester keda central. E oficina a ricibi diferente señal cu e manera actual di anuncia resultado por causa sentimiento di berguensa, frustracion y estres na studiantenan cu no a logra e resultado spera. Segun Ombudsman, e asunto ta particularmente delicado pasobra hopi di e estudiantenan ta menor di edad. P’esey, e derecho na privacidad, dignidad humano y proteccion di mucha mester wordo respetá na tur momento.

RECOMENDACIONNAN

Pa evita situacionnan cu por afecta bienestar emocional di estudiantenan, Ombudsman ta recomenda pa scolnan:

Comunica resultado di examen prome individualmente y confidencialmente na e studiante y su mayor.

Evita identifica directa of indirectamente estudiantenan cu no a slaag.

Haci participacion den celebracionnan y anuncio publico completamente boluntario.

Desaroya un maneho uniforme pa tur scolnan cu ta pone privacidad, dignidad y bienestar di mucha na prome lugar.

Traha hunto cu Inspeccion di Enseñansa pa crea protocolnan cla tocante publicacion di resultado di examen.

Ombudsman ta enfatisa cu un sistema di enseñansa moderno y responsabel mester logra balansa entre celebracion di exito y proteccion di e estudiantenan cu no a logra e resultado deseá, asegurando cu tur mucha ta wordo trata cu respeto y cuidado.