Avond MAVO na Aruba ta introduci programa nobo pa reduci ‘dropouts’

ORANJESTAD – Stichting Avondonderwijs Aruba lo introduci un nobo Starttraject durante aña escolar 2026-2027 cu e meta di reduci e cantidad di studiante cu ta laga scol y aumenta e cantidad cu logra un diploma di MAVO. E decision a wordo tuma despues di un analisis di resultado escolar cu a revela cu hopi studiante ta bandona nan estudio, specialmente durante e di dos aña. Segun e scol, despues di promocionnan y abandono durante aña escolar, solamente mas o menos un tercio di e grupo original ta logra pasa pa siguiente nivel.

SISTEMA NOBO  DI ENTRADA

Cu e programa nobo, tur participante lo cuminsa den e Starttraject, cu lo dura te fin di november. Durante e periodo ey, e studiante lo sigui lesnan na nivel di tercer aña y lo ricibi un ora adicional di guia cada siman. E examen di admision actual lo wordo elimina. E unico requisito pa participa ta tin por lo menos 16 aña di edad. Na december, e studiante cu ta cumpli cu e condicionnan academico, presencia minimo di 80% y recomendacion positivo di mentor, lo pasa oficialmente pa tercer aña.

SEGUNDO OPORTUNIDAD

Studiantenan cu no logra alcanza e rekisito nan na december lo por participa den un programa di refuerzo entre januari y april. Esaki lo duna nan un oportunidad adicional pa drenta den programa regular e siguiente aña escolar.

REGLA NOBO PA EXTENCION

AvondMAVO tambe ta amplia e sistema di extencion di materia. For di awo,  e studiante cu anteriormente a logra un nota final di 6 of mas pa un materia, lo por ricibi extencion pa e materia ey durante un periodo di 10 aña. Anteriormente, e studiante mester a logra por lo menos un 7 y e extencion tabata valido solamente pa un aña escolar. Segun directiva di e scol, e cambionan lo evita cu e studiante mester ripiti materia cu nan ya a domina y lo aumenta e oportunidad pa completa nan estudio cu exito.