Prensa di Ecuador ta reacciona duro: Corsou ta haci historia y La Tri ta keda contra muraya

KANSAS CITY — E empate 0-0 entre Corsou y Ecuador den Mundial 2026 a causa un ola di reaccion fuerte den prensa ecuatoriano. Mientras pa Corsou e resultado ta representa su prome punto historico den un Mundial, pa Ecuador e ta wordo mira como un golpe duro cu ta complica seriamente su futuro den Grupo E.

EL UNIVERSO

Medionan manera El Universo a destaca cu Corsou a gana su prome punto na un Mundial “a costa di Ecuador”, despues cu e seleccion caribeño a perde 7-1 contra Alemania den su debut. E mesun medio ta remarca cu Ecuador awor tin solamente un punto despues di dos partido y ta keda cu un panorama masha dificil.

EXPRESO

Expreso a pone enfoke riba e falta di gol di Ecuador y riba e actuacion extraordinario di Eloy Room. Segun e medio, La Tri tabata superior, a crea hopi oportunidad y a domina pasahenan largo di e partido, pero a “estreya” contra e arquero di Corsou, kende a bira e gran figura di e anochi.

ECUAVISA

Ecuavisa a describi e resultado como un empate cu ta laga Ecuador “contra muraya”. E medio ta señala cu e ekipo di Sebastian Beccacece mester enfrenta Alemania den e ultimo fecha, cu obligacion di logra algo cu ainda no a logra den Mundial 2026: marca gol y gana.

EL COMERCIO

El Comercio tambe a subraya cu Ecuador no por a vence Corsou den un partido decisivo, y cu awor e seleccion ecuatoriano mester busca resultado contra Alemania pa mantene algun posibilidad di pasa ronda. Segun e analisis, e empate a baha drasticamente e opcionnan di La Tri.

Primicias a bay mas leu, señalando cu Ecuador “depende di un milagro” pa avansa na diesiseisavos. E medio a destaca decepcion di mas di 50 mil hincha ecuatoriano na Kansas City, kende a sali frustra despues di mira nan seleccion domina sin logra marca.

COBERTURA ECUATORIANO 

Pa Corsou, e cobertura ecuatoriano tin un otro lectura historico. Aunke hopi articulo ta parti for di decepcion di Ecuador, tur ta reconoce cu e punto di Corsou no ta casualidad solamente, sino resultado di disciplina, defensa fuerte y un Eloy Room inspiradissimo.

Cu e empate aki, Corsou no solamente a suma su prome punto na un Mundial, pero tambe a logra pone prensa internacional y ecuatoriano papia cu respet di un seleccion cu, pese a su tamaño chikito, a demonstra cu den futbol nada ta decidi prome cu e pitazo final.