Rey Willem-Alexander a bishita seleccion di Corsou despues di wega contra Ecuador

KANSAS CITY – Poco despues di e empate historico 0-0 contra Ecuador, seleccion nacional di Corsou a ricibi un bishita special den nan camerino: Rey Willem-Alexander di Reino Hulandes, su casa Reina Maxima y e yui muher.

Segun varios medio hulandes, entre nan NOS y De Telegraaf, e Rey a pasa den camerino di Corsou despues di e partido na Arrowhead Stadium pa felicita entrenador Dick Advocaat, e cuerpo tecnico y e hungadornan pa nan actuacion impresionante riba escenario mundial.

E encuentro tabata uno informal y personal. Rey Willem-Alexander a expresa su admiracion pa e forma cu Corsou a representa Reino Hulandes durante Mundial 2026. Segun reportahenan, e Rey a papia cu diferente hungador y miembro di e delegacion, mientras cu e atmosfera den camerino tabata yena di orgullo y emocion despues di conquista e prome punto den historia di Corsou na un Mundial.

Medionan hulandes a destaca cu e bishita tabata un señal claro di apoyo na e seleccion caribeño. E empate contra Ecuador ya tabata wordo considera un di e sorpresanan mas grandi di e fase di grupo, cu portero Eloy Room converti den e gran heroe di anochi gracias na su numeroso paradanan decisivo.

Entrenador Dick Advocaat a bisa cu e gesto di e Rey a wordo aprecia enormemente pa e grupo. Segun e veterano entrenador, e reconocemento a agrega ainda mas significado na un anochi cu caba tabata historico pa futbol corsou.

E bishita tambe a crea un contraste notable cu loke a sosode solamente seis dia promé, ora Corsou a perde 7-1 contra Alemania. Despues di e golpe ey, hopi observador no tabata sigur si e seleccion por recupera. Sinembargo, cu caracter, disciplina y un actuacion monumental di Eloy Room, Corsou a logra un resultado cu a capta atencion mundial.

Pa hopi curasoleño, e presencia di Rey Willem-Alexander den camerino tabata mas cu solamente un saludo protocolario. Tabata un reconocemento cu e seleccion a logra algo historico y cu nan prestacion contra Ecuador a gana respeto den henter Reino y mucho mas aya di dje.

Awo tur atencion ta bira na e ultimo partido di grupo contra Costa di Marfil. Pero pase loke pase den e encuentro ey, e empate contra Ecuador y e bishita posterior di e Rey ya a haya nan lugar den historia di deporte corsou.