‘Fiesta di Cunucu pa Nos Grandinan’ lo bolbe na Santa Rosa

ORANJESTAD – Despues di e exito di prome edicion aña pasa, ‘Fiesta di Cunucu pa Nos Grandinan’ lo bolbe tuma lugar dia 28 di juni na Santa Rosa, cu enfoke riba bienestar, participacion social y contacto cu naturalesa pa nos adultonan mayor.

E actividad ta un iniciativa di Directie Ouderenzaken (DOZ) y Santa Rosa, cu meta di mantene nos grandinan activo, conecta cu comunidad y involucra den actividadnan cu contribui na nan bienestar fisico y mental.

Segun e organisadornan, contacto cu naturalesa y participacion den actividadnan social ta yuda combati isolamento y fortalece calidad di bida di adulto mayor. E evento tambe lo crea oportunidad pa diferente generacionnan reuni y comparti conocemento, custumbernan y tradicionnan relaciona cu cunucu y agricultura.

E celebracion lo ofrece un dia yen di ambiente familiar, cuminda crioyo, producto local y actividadnan cultural. Pasobra e fecha ta cay cerca di celebracion di San Juan, e evento lo tin tambe un toque cultural especial.

E organisadornan ta invita tur adulto mayor y famianan pa participa den un dia dedica na convivencia, tradicion y bienestar.