Victoria contra Suecia lo pone Hulanda cu un pia den siguiente ronda di Mundial

HOUSTON – E seleccion nacional di Hulanda por haci un paso gigantesco rumbo pa siguiente ronda di Copa Mundial FIFA 2026 si logra gana Suecia diasabra.

Segun calculacionnan di Opta, socio oficial di estadistica di FIFA, un victoria lo pone Hulanda cu cuatro punto den e grupo. E cantidad di punto ey ta duna Oranje un posibilidad di 99,8% pa clasifica pa fase eliminatorio di torneo.

Den e Mundial actual, cu 48 pais participante, no solamente e dos mehor ekipo di cada grupo ta pasa, sino tambe e ocho mehor ekipo cu termina na di tres lugar.

Segun e modelonan estadistico, cuater punto casi sempre ta suficiente pa logra clasificacion. Incluso cu tres punto, un ekipo ainda tin un bon posibilidad pa pasa ronda.

Hulanda a cuminsa su participacion den Mundial cu un empate 2-2 contra Japon y awor ta prepara pa enfrenta Suecia den un partido crucial.

Ademas, historicamente Hulanda tin bentaha riba Suecia. Di e siete encuentro entre ambos paisnan den e siglo aki, Hulanda a gana tres, tres a termina empata y Suecia a logra solamente un victoria.

Tambe e principal casnan di apuesta internacional ta considera Hulanda como e gran favorito pa e encuentro.

Un victoria contra Suecia lo acerca Oranje considerablemente na fase eliminatorio y lo reduci casi completamente cualkier duda tocante e clasificacion pa siguiente ronda.