Dera Gay 2026 lo bay directamente den bario cu musica, tradicion y competencia

ORANJESTAD – Gobierno di Aruba, hunto cu Comision Celebracion di Dianan Nacional (CCDN) y UNOCA, lo trece e celebracion di Dia di San Juan y Dera Gay directamente den diferente bario riba diaranson 24 di juni.

Bou e lema “Ban celebra Dia di Dera Gay den bario”, un trailer cultural lo recorre varios districto di Aruba entre 4:00 di atardi y 8:00 di anochi, llevando musica, baile, tradicion y actividadnan cultural cerca di comunidad.

E parada cultural lo bishita Bushiri Complex, Centro di Bario y Deporte Dakota, Mabon Kavel y lo termina cu un gran final na Carnival Village na San Nicolas.

Durante e celebracion, habitantenan lo por disfruta di presentacionnan cultural di Grupo Masiduri y Grupo Cariño, y tambe participa den diferente competencia tradicional manera:

Bulamento di candela,competencia di grito di gay, competencia di grito di galiña, competencia di e grito mas largo di gay, buscamento di bandera, dera Gay

Lo tin diferente premio pa esnan cu participa.

Segun e organisadornan, e iniciativa tin como meta fortalece nos herencia cultural, promove participacion di comunidad y mantene bibo un tradicion cu ta forma parti importante di identidad arubiano.

Gobierno, CCDN y UNOCA ta invita tur habitante, specialmente esnan di Bushiri, Dakota y Mabon, pa participa activamente den un celebracion yen di cultura, alegria y orguyo nacional.

“Dera Gay 2026: Cultura den bario, tradicion den curason di nos pueblo.”