Ombudsman: Situacion limita na proceso di inscripcion na Censo ta alarmante

ORANJESTAD  - Ombudsman di Aruba, mr. sra. Jurima Bryson, a ricibi un cantidad creciente di keho y señal for di personanan cu tin dificultad pa haña un cita pa inscribi na Oficina di Censo y Registro Civil (Censo). For di e kehonan ricibi ta sali na cla cu hopi ciudadano no ta logra haña un cita den un tempo rasonabel pa inscribi den registro civil. Segun Ombudsman, ta parce cu tin un desbalansa structural entre e cantidad di peticion pa inscripcion y e capacidad disponibel pa procesa esaki. 

KEN E TA AFECTA 

E problematica no ta afecta solamente personanan cu a ricibi un permiso di estadia recientemente, sino tambe Arubianonan cu ta bolbe Aruba despues di un estadia den exterior y cu mester inscribi nan mes atrobe. Como consecuencia, ciudadanonan ta experiencia periodonan largo di espera y incertidumbre tocante e momento cu nan por completa nan inscripcion.

CONSECUENCIANAN SIGNIFICANTE 

E consecuencia nan ta significante. Inscripcion den registro civil ta un condicion importante pa haya acceso na diferente servicio. Sin inscripcion, ciudadanonan por haya problema pa obtene acceso na cuido di salud (AZV), educacion, beneficionan social, trabou, servicio bancario, seguro y vivienda. Segun Ombudsman, no por ta asina cu, como resultado di problema di capacidad y organisacion na Censo, ciudadanonan no por haya acceso den un termino rasonabel na un servicio gubernamental asina esencial. Segun Ombudsman, gobierno mester organisa su servicio di tal forma cu ciudadanonan realmente por haci uso di e derechonan cu nan tin.

CARTA PA MINISTER 

Den cuadro di e situacion aki, Ombudsman a manda un carta di preocupacion (zorgenbrief) pa Minister di Husticia y Asuntonan Social, mr. drs. Arthur Dowers, dia 15 di juni 2026. Como un institucion independiente y imparcial, Ombudsman a presenta varios conseho pa mehora e accesibilidad, puntualidad y continuidad di e proceso di inscripcion. Entre otro, e consehonan ta enfoca riba reduci e atraso existente, amplia e posibilidadnan pa haña cita, fortalece e capacidad pa por procesa e cantidad di peticion y mehora informacion brinda na e ciudadano.

CENSO TA NA ALTURA DI PROBLEMANAN

Noticiacla mientrastanto a compronde cu Censo ta completamente na altura di e problemanan y a bati alarma nan mes caba, tanto na minister encarga incluyendo otro departamentonan concerni. A compronde cu nan a wordo sorprendi cu fluho di cliente ora cu gobierno a dicidi di haci cambio na e proceso di permiso, y no a adapta e situacion di personal pa yuda acapara e situacion cu a surgi.