DMN: Secura y degradacion di suelo ta sigui amenaza pa Aruba

ORANJESTAD – Na ocasion di Dia Mundial pa Combati Secura y Suelonan Degrada, expertonan ta alerta cu Aruba ta enfrenta desafionan creciente debi na su clima semi-arido y e efectonan di cambio climatico.

Periodonan di secura mas largo, temperaturanan mas halto y erosion di tera ta poniendo presion riba nos medio ambiente, biodiversidad y agricultura local. Segun experto nan, e degradacion di suelo no solamente ta afecta mata y animalnan, pero tambe ta pone na riesgo produccion local di alimento y por empeora problema di calidad di aire debi na mas stof den ambiente.

Ciudadanonan por contribui na solucion cu accionnan simpel manera uza awa cu mas consciencia, planta mata local resistente na secura, aplica compost y proteha e suelo cu material natural pa retene humedad.

Specialistanan ta enfatisa cu un suelo saludabel ta esencial pa un Aruba mas resiliente y cu e lucha contra secura y degradacion di tera ta un responsabilidad comparti di henter comunidad. Mantene nos recurso naturalnan proteha awor ta clave pa garantisa un futuro mas sostenible pa proximo generacionnan.