Ultimatum ‘oficial’ a vence y e e-stepnan ta riba caminda publico keto bay!

ORANJESTAD – Diaranson mainta ainda tabatin e-steps y e-scooters riba e strip di hotel na Aruba, siendo cu gobierno a duna e companianan 2 siman pa regla nan asuntonan cu ta inclui cu nan mester a kita tur e stepnan of regla nan asuntonan di tal forma. E declaracion a bay aden 29 di mei ultimo y publica den Landscourant, cu ta nifica cu mas tarda 15 di juni 2026, e stepnan mester a ‘disparce’. Sinembargo, ainda e stepnan ta netchi plama tur caminda manera cu e tabata anteriormente. Segun oficina di minister Dowers, nan a confirma cu e ultimatum di dos siman a vence y cu no mester tin e-step mas riba caminda. 

AVISO OFICIAL

Mirando cu e prome biaha, huez a bati riba dede di gobierno, pa e forma cu gobierno a kita e aparatonan for di caminda, sin previo aviso 'legal', e biaha aki a haci tur cos diferente y 'netchi'. Conforme orden y regla di huez, den un aviso oficial, Gobierno a duna un periodo di 14 dia calendario despues di publicacion pa operadornan stop cu e actividadnan ilegal of regularisa nan situacion conforme ley. Entre otro, empresanan mester: stop cu huur di e vehiculonan; desactiva QR-codes, apps y otro sistema digital di huur; kita e vehiculonan for di caminda publico y area accesibel pa publico; elimina publicidad y señalnan relaciona cu e huurmento. 

KICO E SITUACION TA?E aviso ta bisa cu despues di 14 dia calendario, cu ta nifica tur e dianan, incluyendo fin di siman, despues di e publicacion (cu tabata 29 di mei ultimo),  e ultimatum ta vence. Y awe mainta, por a mira visualmente cu tabatin e-step riba caminda manera cu tabata antes. Esey kier men cu ainda ta huur e vehiculonan, cu nan no a wordo desactiva, y cu obviamente no a ‘kita’ nan for di caminda, y elimina asina e publicidad. 

KICO TA PASA AWO?

E palabra awor ta na gobierno pa wak si e biaha aki si nan tin pia pa para ariba, conforme e anuncio, y cu si awor si nan por bay ‘piki’ e e-stepsnan, sin cu un huez of corte bolbe obliga gobierno pa ‘pone cos bek’.