Mas cu 500 boet duna den 5 luna durante accion contra parkeo ilegal den Oranjestad

ORANJESTAD – Polis di Oranjestad ta sigui intensifica su accion contra vehiculonan cu ta staciona ilegalmente den centro di ciudad. Como parti di un projecto conhunto cu Aruparking, un total di 536 boet a wordo entrega entre januari y mei di 2026.

E iniciativa, cu a wordo anuncia na oktober 2025, tin como meta mehora e situacion di parkeo den centro di Oranjestad y den e vecindarionan rond di e area comercial.

Polis ta hunga un rol central den e accion, pasobra e ta e autoridad encarga cu fiscalisacion y imposicion di multa ora tin infraccion relaciona cu parkeo ilegal.

Ademas di controla vehiculonan cu ta staciona den luga no permiti, e accion ta enfoca tambe riba cumplimiento di reglanan di parkeo y pago correcto na parkeermeternan.

Segun e cifranan mas reciente, durante e prome cinco lunanan di 2026, polis a entrega 536 boet, a detene un persona y a ordena remolca un total di 323 vehiculo cu tabata staciona ilegalmente.

Autoridadnan ta indica cu e colaboracion entre Cuerpo Policial Aruba (KPA) y Aruparking ta sigui siendo esencial pa mehora e fluho di trafico, mantene e orden publico y contribui na un mihor calidad di bida den centro di Oranjestad.

Polis ta enfatisa cu controlnan lo continua y ta haci un yamada na conductornan pa respeta e reglanan di parkeo pa evita multa y otro medida correctivo.