Turismo a genera USD 3,06 biyon na Aruba durante 2025

ORANJESTAD – Aruba Tourism Authority (A.T.A.) a presenta e resultado di su investigacion anual di gasto di bishitantenan. E estudio, basa riba mas di 8.000 encuesta colecta na aeropuerto, ta mustra cu turismo a sigui siendo un motor economico importante pa Aruba durante 2025.

Segun e resultado, bishitantenan a gasta un total di USD 3,06 biyon na Aruba durante 2025. E gasto promedio pa persona pa dia a alcanza USD 297, mientras cu gasto promedio pa estadia a yega USD 2.019 pa persona. Pa grupo di biahero, gasto promedio a situa na USD 4.989.

E investigacion ta mustra cu alohamento ta representa e parti mas grandi di e gasto turistico, cu 38% di total. Cuminda y bebida pafo di hotel of acomodacion a representa 13%, mientras cu consumo den acomodacion a conta pa otro 12%.

Mercado di Norte America a sigui domina e contribucion economico, generando USD 2,37 biyon, equivalente na 78% di tur gasto turistico. Latino America a aporta USD 460 miyon (15%), mientras cu Europa a contribui cu USD 144 miyon (5%).

A.T.A. a indica cu e resultado nan ta basa riba un muestra representativo di mas cu 8.000 encuesta, cu 64% di e respondeentenan siendo bishitantenan nobo y 36% siendo turista cu ta bolbe bishita Aruba regularmente.