Departamento di Recherche a bay den accion na Centro di Husticia

ORANJESTAD – Presidente di Sindicato di Polis Aruba (SPA), Lito Laclé, a pinta un cuadro preocupante tocante e situacion actual den Departamento di Recherche, durante un entrevista cu prensa local diahuebs mainta pafor di Centro di Husticia na Macuarima, durante un accion di personal di e departamento. 

FALTA DI REACCION 

Segun Laclé, e accion sindical cu a tuma luga no ta un reaccion repentino, sino resultado di añanan di advertencianan cu, segun  e, no a wordo tende door di e autoridadnan competente. “ Nos a bati alarma durante añanan. Nos a manda varios carta na mando policial y tambe na Ministerio Publico, pero te awor no tin solucion concreto pa e problemanan cu nos ta confronta diariamente,” Laclé a declara.

ESCASES DI PERSONAL DI RECHERCHE

Presidente di SPA a indica cu e escasez di personal den Recherche a yega na un punto critico. Segun e cifranan presenta door di dje, actualmente tin solamente 22 rechercheur disponible pa atende e trabou, mientras cu e departamento mester tin aproximadamente 51 empleado pa por funciona adecuadamente. “Nos ta papia di un deficit enorme. Tin colega cu tin mas di 30 aña di experiencia cu no sa con mas pa bati alarma. E situacion ta afecta no solamente e trabou, pero tambe e salud mental y fisico di nos personal,” Laclé a enfatisa.

TRAHANDO ORANAN EXTREMADAMENTE LARGO

Laclé a revela cu polisnan regularmente ta traha wardanan extremadamente largo, hopi biaha di 16 ora of mas pa dia, pa logra mantene e servicio basico na comunidad. “Ningun hende no sa mas si awe ta diabierna of diadomingo. Hende ta traha sin para, pa mantene e sistema funcionando, pero e sistema mes ta rompi.”

FALTA DI ATENCION DI AUTORIDADNAN COMPETENTE

Laclé tambe a expresa preocupacion tocante e falta di atencion cu, segun e, e problema ta ricibi for di e autoridadnan. E la alegra cu diferente peticion y comunicacion formal no a haya e reaccion desea. Segun e presidente di SPA, tanto Distrito Noord como Distrito San Nicolas ta sinti e impacto di e escasez di personal. E la menciona cu e situacion actual por afecta e capacidad di e cuerpo policial pa responde rapidamente na casonan criminal y otro incidente serio.

RIESGO PA SEGURIDAD PUBLICO

“Tin momento cu e carga di trabou ta simplemente demasiado grandi pa e cantidad di personal disponible. Esey ta crea un riesgo pa seguridad publico y pa e mes personal policial.” Laclé a declara cu SPA ta sperando cu Gobierno, mando policial y Ministerio di Husticia sinta hunto cu urgencia pa busca solucionnan sostenibel. Segun  e, e sindicato ta dispuesto pa sigui dialoga, pero a enfatisa cu e situacion no por sigui manera ta awor. “Nos no ta pidiendo imposibel. Nos ta pidiendo cu hende tende e realidad den cual nos polisnan y rechercheurnan ta trahando cada dia. Aruba mester un departamento di Recherche fuerte pa proteha su ciudadano nan.”

DIFERENTE ACCION 

E declaracionnan di presidente di SPA ta bin poco dia despues cu sindicato a organiza diferente accionnan pa pone enfasis riba e escasez di personal y e presion creciente cu e cuerpo policial ta confrontando. SPA ta spera cu e proximonan reunionnan cu e autoridadnan concerni lo resulta den medida concreto pa fortalece e capacidad operacional di Departamento di Recherche y mehora e condicionnan laboral di su personal.