FLP ta revela ganador di rifa durante celebracion “Papiamento den Hofi”

ORANJESTAD – Fundacion Lanta Papiamento (FLP) a comparti su satisfaccion despues di un celebracion exitoso di e 23 aniversario di oficialisacion di idioma Papiamento, evento cu a tuma luga recientemente na Departamento Arubiana-Caribiana di Biblioteca Nacional Aruba (BNA).

E actividad cultural “Papiamento den Hofi” a logra reuni un publico numeroso den un ambiente di orguyo, union y apreciacion pa idioma materno di Aruba. Durante e anochi  special aki, asistentenan a disfruta di diferente presentacion y actividad cu a pone enfasis riba importancia y riqueza di Papiamento.

Como parti di e celebracion, FLP tambe a organisa un rifa especial pa e participantenan. Dialuna, via su plataformanan social, fundacion a anuncia cu e ticket ganador ta e number #403020.

Ganador di e rifa lo ricibi e buki “Ata Compa Nanzi Atrobe!” como premio. FLP ta invita e persona cu tin e ticket ganador pa contacta fundacion via un mensahe priva (DM) riba Facebook na @flparuba pa coordina entrega di e premio.

Fundacion Lanta Papiamento a expresa agradecimento na tur persona cu a participa den e actividad y na tur esnan cu ta sigui apoyando y promoviendo idioma Papiamento.

Segun FLP, e compromiso ta sigui firme pa proteha, fortalece y pasa nos idioma y cultura pa generacionnan futuro. “Ban promove nos idioma,” tabata e mensahe central di e celebracion.