SETAR ta prepara Aruba pa era di “smart cities” y tecnologia IoT

(ADVERTORIAL)

ORANJESTAD - SETAR a traha riba introduccion di tecnologia nobo na Aruba cu lo permiti mas aparato y sistema comunica automaticamente via internet, algo conoci como “Internet of Things” (IoT). Segun director di SETAR, Roland Croes, e innovacionnan aki lo habri caminda pa mas automatizacion, control digital y servicio inteligente riba isla.

Croes a splica cu IoT ta permiti uso di sensor y aparato cu ta usa hopi poco energia pa manda informacion via un red special LTE Cat M1. E tecnologia lo por wordo usa den diferente area manera salud, estacionamento, luznan automatico, septic tank, control di awa y otro servicio inteligente.

“Bo por pone un sensor cu un bateria cu ta dura 10 aña y e aparato por sigui manda señal y monitor informacion,” Croes a declara. “E sistema ta usa very low power y very low data, pero e ta habri hopi posibilidad nobo pa Aruba.”

SETAR tambe a desaroya solucionnan pa “smart fleet management”, permitiendo companianan controla y monitorea nan vehiculonan, mantenimiento, ruta y uso di flota via sensor y sistema digital. Pa esey, SETAR ta colabora cu e compania internacional Geotab.

Segun Croes, e tecnologia nobo lo traha riba e actual red LTE y posteriormente lo conecta cu futuro red 5G. E meta ta pa crea mas eficiencia, menos gasto di bateria y mas conectividad pa aparato inteligente den Aruba.

“E red ta importante pa smart cities, smart metering y hopi otro servicio moderno cu nos kier introduci na Aruba,” Croes a enfatisa.