Caso Flamingo ta bek den corte Corte awe dialuna mainta

ORANJESTAD - Otmar Oduber, Richinella Wever y Eisia Esser lo bolbe presenta dilanti di Corte Superior awe dialuna mainta 10'or,  ora cu apelacion den Caso Flamingo wordo trata oficialmente, esta for di 1 te cu 5 di juni.

E apelacion a wordo presenta tanto door di Ministerio Publico como defensa despues cu Corte anteriormente a declara Oduber y Wever culpabel di diferente delito relaciona cu abuso di funcion, falsificacion y malversacion. Esser, sin embargo, a keda liber di acusacionnan.

Fiscal ta insistiendo riba castigonan mas severo, specialmente pa Oduber, alegando cu el a usa su posicion ministerial pa beneficia particularnan y afecta confianza di pueblo den gobierno.

Den e sentencia anterior, Corte a conclui cu tabatin indicacion di trato preferencial y abuso di poder den dunamento di terreno, entre otro den area di Malmok. Wever, segun Corte, tabata activamente involvi den proceso administrativo.

Durante e tratamiento di apelacion, e acusadonan lo haya oportunidad pa presenta nan defensa atrobe mientras cu Corte Superior lo reevalua tur prueba y decisionnan anterior pa determina si e condenacionnan ta keda, ta wordo modifica of si tin liberacion adicional. Noticiacla lo cubri e caso manera ta custumber.