Cft ta alerta riba crisis financiero na empresa estatal y fondonan social di Sint Maarten

PHILIPSBURG – College financieel toezicht (Cft) a expresa preocupacion serio tocante e estado financiero di diferente entidadnan gubernamental y fondonan social na Sint Maarten. Segun Cft, si gobierno no tuma accion rapido, e pais por enfrenta consecuencianan financiero grave den añanan benidero.

Entre e empresa estatal cu ta bao di fuerte presion financiero tin TELEM, GEBE y PSS. Cft a indica cu falta di un politica efectivo pa maneho di participacionnan gubernamental a contribui na e problema actual. Segun e organismo di supervision, mester implementa solucionnan urgente y fortalece governance den e entidadnan aki.

Cft tambe a pone enfasis riba e situacion preocupante di Social & Health Insurances SZV, cu ta maneha e fondonan di seguro social y medico. Actualmente, e fondonan di cuido ta registra perdidanan anual di aproximadamente 35 miyon florin, mientras cu e deficit acumula a subi te cerca 500 miyon florin.

Te awor, e deficitnan tabata wordo cubri cu reservanan di otro fondonan, principalmente e fondo di pensioen AOV. Sinembargo, Cft a adverti cu e reservanan lo caba dentro di algun aña, poniendo tanto cuido medico como pensioen di ciudadanonan bao di gran presion financiero.

Pa enfrenta e crisis, Sint Maarten ta trahando riba introduccion di un seguro medico general (GHI) prome cu 1 di januari 2027. Gobierno tambe tin intencion di introduci un impuesto pa turistanan y haci reformanan den sistema di impuesto pa aumenta entrada fiscal y fortalece recaudacion.

Ademas di e preocupacionnan financiero, Cft a critica e retrasonan continuo den preparacion di presupuesto nacional. E presupuesto pa 2026 ainda no ta cla, mientras cu gobierno awor ta intentando prepara e presupuesto pa 2027 na tempo. Segun Cft, ministerionan no ta entregando informacion puntual, loke ta creando obstaculonan den e proceso.

Cft a urgi Consejo di Minister pa actua cu mas sentido di urgencia y responsabilidad, enfatizando cu e situacion financiero actual y e incertidumbre geopolitico mundial ta exigi accion inmediato.