Gregory Elias: Artistanan grandi ta birando casi impagabel pa festivalnan manera CNSJ

ORANJESTAD – Gregory Elias a declara cu un di e reto mas grandi pa organiza Curaçao North Sea Jazz Festival ta e aumento enorme den prijs di artistanan internacional. E la declara esaki durante un entrevista exclusivo cu Tito Laclé den e programa Noticiacla LIVE diahuebs anoc

Segun Elias, ciertonan artista awor ta costa tres te cinco biaha mas cu tempo cu nan a cuminza. E la menciona cu artistanan hoben y popular, manera Maluma, ta importante pa mantene e line-up atractivo pa publico. “Nos ta busca y aposta riba talentonan nobo cu speransa cu ainda nan ta pagabel,” asina e la comenta.

Como ehempel, e la bisa cu si un festival kier trece un artista manera Bruno Mars awe, e costo por ta cinco biaha mas halto cu na 2014.

Elias tambe a menciona artistanan legendario manera Rubén Blades, Stevie Wonder y Sting, bisando cu hopi concierto awor ta bira mas basa riba “performance” cu realmente musica.

Apesar di e desafio financiero, Gregory Elias ta sigur cu e festival lo logra presenta un line-up varia e aña aki, cu artistanan pa diferente gusto musical y pa diferente generacion di fanatico di musica. E festival ta tuma lugar 3,4 y 5 di September di e aña aki na Corsou.