Gregory Elias: “Amor pa musica y apoyo di pueblo ta mantene e festival bibo”

ORANJESTAD – Gregory Elias a expresa den un entrevista exclusivo den e programa Noticiacla Cla LIVE na periodista Tito Laclé, cu pa organisa un festival grandi manera Curaçao North Sea Jazz Festival, prome cu tur cos un persona mester ta un berdadero amante di musica.

Segun Elias, e caminda pa crea y mantene un festival di e nivel aki no ta facil. “Bo mester tin hende rond di bo cu ta pensa hunto cu bo, aunke algun biaha nan por pensa cu bo ta loco,” asina e la comenta.

E la enfatisa cu e reaccion positivo di hende di Corsou y tambe for di otro paisnan ta algo unico y ta duna energia pa sigui cu e proyecto. Sinembargo, e la bisa cu un organizador mester keda humilde y cu “dos pia riba tera”, paso si bo laga emocion controla bo, e festival por no logra e exito desea.

Gregory Elias tambe a destaca cu organisa un evento di e tamaño aki ta exigi hopi atencion, dedicacion y responsabilidad.

Finalmente, e la expresa su gratitud pa e apoyo cu e festival ta ricibi tanto di turistannan como hende local for di Corsou, Aruba, Surnam y otro paisnan, algo cu segun e, ta haci e evento ainda mas special pa Corsou.