Gregory Elias: Curacao North Sea Jazz lo sigui, pero e baton lo cambia di man un dia

WILLEMSTAD  – Organisador di Curaçao North Sea Jazz Festival, Gregory Elias, a expresa den un entrevista exclusivo den e programa Noticiacla LIVE cu periodista Tito Laclé, cu e festival ainda tin hopi futuro, pero cu algun dia lo yega un momento pa entrega liderazgo na otro persona.

Segun Elias, e intencion ta pa sigui cu e festival durante e proximo tres te cinco aña y posiblemente hasta dies aña, dependiendo di disponibilidad di artistanan, apoyo tecnico y entusiasmo di tur persona involucra den e organizacion.

E la splica cu musica ta su gran pasion y cu e festival no lo para simplemente si e  mes decidi ba baha. “E festival lo sigui, pero no necesariamente cu Gregory Elias na cabez,” asina e  la indica.

E fundador tambe a bisa cu, cu tempo y edad, un persona ta cambia su perspectiva y ta bira mas critico riba musica y riba loke realmente e kier haci. P’e, lo yega un momento cu e baton mester wordo pasa pa otro generacion.

Finalmente, Gregory Elias a invita publico pa atende e festival cu lo tuma luga dia 3, 4 y 5 di September di e aña aki, enfatizando cu tin  artistanan grandi programa y cu hende ainda tin tempo pa cumpra ticket y haci preparacion pa e evento. Awe tardi por cierto lo anuncia e ultimo 4 artistanan.