Vrolijk (MEP) ta presenta ley nobo pa logra kwijtschelding di 50% di debe

ORANJESTAD - Parlamentario di MEP, Edgard Vrolijk, a presenta un iniciativa di ley nobo pa modernisa e sistema di studielening na Aruba y crea mas oportunidad pa graduadonan haya kwijtschelding di debe. Segun Vrolijk, e propuesta ta nace for di su experiencia como maestro, unda e la mira hopi hoben stop di sigui studia pa motibo financiero, mientras cu otro graduadonan a bolbe Aruba carga cu debenan demasiado halto.

E ley nobo ta reemplasa e sistema actual cu ta basa riba reglanan cu data di 2006. E propuesta ta unifica tur regla importante tocante prestamo, pago y kwijtschelding den un solo ley moderno y transparente. Entre e cambionan principal, ta e posibilidad pa studielening dura mas cu cinco aña, algo cu ta duna mas flexibilidad pa estudio superior.

Tambe ta habri e posibilidad pa 50% kwijtschelding di debe pa graduadonan cu termina nan estudio y ta traha na Aruba of cu bolbe biba na Aruba dentro di cinco aña despues di gradua. Adicionalmente, tin un descuento di 30% pa esunnan cu paga nan debe den un solo pago, mientras cu den casonan special manera invalides permanente of malesa cronico, e ley ta permiti kwijtschelding completo.

Segun datonan di Ministerio di Finansa, di casi 395 miyon florin cu a wordo presta como studielening, solamente cerca di 5 miyon florin ta wordo cobra bek pa aña. Pa Vrolijk, esaki ta demuestra cu e carga financiero actual ta demasiado grandi pa hopi graduado.

E parlamentario a bisa cu e propuesta no solamente ta yuda estudiantenan, pero tambe Aruba mes, pasobra e ta motiva profesionalnan hoben pa regresa y contribui na sectornan importante manera salud, enseñansa, turismo, infrastructura y tecnologia.

Awor cu e iniciativa di ley a wordo entrega na Parlamento, e siguiente paso ta e debate y tratamiento oficial den sala di Parlamento.