Tweede Kamer kier islanan ABC beneficia di desaroyonan economico rond di Venezuela

DEN HAAG  – Un mayoria grandi den Tweede Kamer hulandes kier cu gobierno hulandes sigura cu Aruba, Corsou y Boneiru por beneficia di futuro desaroyonan economico y diplomatico relaciona cu Venezuela. Asina e portal Curacao Chronicle ta raporta. 

Un mocion presenta door di parlamentario Joost Hoogeveen y su colega di partido Annabel Nanninga a ricibi amplio respaldo den Parlamento diaranson.

Den e mocion, e parlamentarianonan ta referi na loke nan a describi como un plan di tres paso di Merca cu tin como meta recuperacion economico di Venezuela. Segun e parlamentarianonan, Aruba, Corsou y Boneiru tin un posicion strategico pa funciona como un “brug natural” entre Reino Hulandes y Venezuela, debi na nan ubicacion geografico.

E mocion ta pidi cu gobierno hulandes consulta dentro di Reino Hulandes con e partenan caribense di Reino por wordo conecta mihor cu desaroyonan diplomatico y economico rond di Venezuela.

Solamente Partido voor de Dieren a vota contra e propuesta.

E respaldo parlamentario ta bin den medio di discusionnan creciente na Hulanda tocante importancia geopolitico y economico di e islanan den Caribe Zuid relaciona cu Venezuela. Durante e ultimo lunanan, parlamentarianonan hulandes a debate varios biaha tocante seguridad regional, comercio y oportunidadnan economico conecta cu Venezuela y e region caribense.

E mocion por aumenta presion riba gobierno hulandes pa involucra Aruba, Corsou y Boneiru mas activamente den futuro strategianan economico regional, especialmente si sancionnan internacional contra Venezuela sigui wordo alivia y actividad economico den e pais vecino sigui crece.

Pa Corsou particularmente, e tema tin gran importancia economico debi na e relacion comercial historico cu Venezuela, incluyendo comercio, logistica, servicio maritimo, actividadnan di refineria y transporte regional.

Promotornan di e mocion ta argumenta cu e partenan caribense di Reino no mester keda na un banda si cooperacion economico internacional cu Venezuela aumenta den e añanan venidero.