Prome Minister di St. Maarten ta confirma: Mayoria di doctor di cas no tin certificacion local

PHILIPSBURG – Prome Minister di St. Maarten, dr. Luc Mercelina, a confirma durante un sesion parlamentario cu mayoria di doctor di cas cu ta traha riba e isla no tin certificacion local oficial. Mercelina mes di profesion original, ta un ciruhano.

Segun Mercelina, solamente cuater for di 19 doctor general cu actualmente ta practica na St. Maarten tin e certificacion specialisa cu normalmente ta wordo spera pa e tipo di posicionnan aki.

E revelacion a crea preocupacion den diferente circulo politico y medico,  specialmente paso e declaracion a wordo haci durante un sesion di Parlamento cu a wordo transmite en bibo.

Apesar di e situacion, Prome Minister a busca pa calma comunidad indicando cu e otro 15 doctornan ta sigui brinda  cuido medico legalmente bou di e reglamentacionnan actual cu ta vigente na St. Maarten.

Mercelina a enfatisa cu, aunke nan no tin certificacion local specialisa, e doctornan ta autorisa pa continua eherce nan profesion segun e ley actual.

E tema aki a habri un discusion amplio riba control, regulacion y calidad di servicio medico riba St. Maarten, especialmente den un momento unda sector di salud den Caribe ta enfrentando diferente reto relaciona cu falta di personal medico y demanda creciente pa cuido di salud.

Diferente observadornan politico y miembro di comunidad awor ta pidi mas claridad tocante e proceso di certificacion y supervision di profesionalnan medico riba e isla.

Gobierno di St. Maarten ainda no a anuncia si lo tin cambionan den ley of regulacion pa reforza e rekisito nan di certificacion local den futuro.