Dolfijn Charlie a fayece despues di lucha balente pa sobrevivi den laman

ORANJESTAD – Aruba Marine Mammal Foundation (AMMF) a confirma cu e dolfijn yama Charlie a fayece dialuna anochi despues di un periodo intenso di cuido y esfuerzo pa salba su bida, despues cu e animal a strand na Aruba y tabata mustra señanan di recuperacion.

Segun e comunicado oficial di AMMF, Charlie tabata den awa cu boluntarionan cu tabata sostene su curpa pa preveni cu e  hoga, pasobra e no tabata por a mantene su mes flotando mas. Apesar di e cuido constante y dedicacion di boluntarionan durante dos siman consecutivo, su condicion a deteriora rapidamente. Pa mas o menos 11:35 di anochi, curason di Charlie a stop. Segun AMMF, e dolfijn a fayece trankilamente mientras cu boluntarionan tabata carg’e den awa. E organisacion a indica cu e animal no a sufri durante su ultimo momentonan.

E caso di Charlie a move hopi miembro di comunidad durante e ultimo dianan, cu numeroso boluntario, experto y ciudadano preocupa a uni forza pa duna e animal un oportunidad pa sobrebibi. Riba social media, hopi hende a comparti palabranan di tristesa y gratitud pa e esfuerzo enorme cu a wordo haci. AMMF a expresa agradecimento profundo na tur persona cu a contribui cu tempo, amor, sosten y colaboracion durante e operacion di rescate y cuido. Segun e fundacion, e apoyo di comunidad a permiti cu Charlie por a lucha pa su bida te su ultimo momento.

Actualmente, un autopsia ta andamento pa determina exactamente kiko por a causa e deterioracion di su condicion y eventual morto. AMMF a anuncia cu mas informacion lo wordo comparti mas despues.

Cu morto di Charlie, un capitulo emocional pa hopi amante di animal y defensornan di bida marino na Aruba a yega na un final triste, pero cu tambe ta destaca e compromiso y compasion di hopi boluntario cu no a laga e dolfijn lucha su bataya su so.