“Papiamento den Hofi” lo celebra idioma y cultura arubiano na Arubiana

ORANJESTAD – Fundacion Lanta Papiamento (FLP) ta invita comunidad arubiano pa participa den “Papiamento den Hofi”, un anochi cultural y educativo dedica completamente na celebracion di nos idioma materno, Papiamento.

E actividad lo tuma lugar diaranson 27 di mei 2026 na sala y cura di Arubiana, departamento di Biblioteca Nacional Aruba (BNA) na Bachstraat, for di 6:30’or di anochi te 9:00’or. Entrada ta gratis pa tur hende.

Segun FLP, e celebracion di e aña aki ta especialmente importante pasobra diferente organisacion na Aruba a brinda atencion na 23 aniversario di oficialisacion di Papiamento, celebra riba 21 di mei. Fundacion ta mira esaki como un señal positivo di mayor conscientisacion tocante importancia di Papiamento den nos identidad y patrimonio cultural.

Programa di “Papiamento den Hofi” lo inclui exhibicion di video tocante historia di Papiamento, charla, poesia, contamento di historia, musica, baile y bendemento di bukinan. Tambe lo tin un microfono habri pa participante cu kier comparti poesia of historia cortico den Papiamento.

Esnan interesa pa participa por inscribi na yegada of via telefoon y WhatsApp na 567-4699.

Cu e lema “Papiamento, nos idioma, nos derecho!”, FLP ta anima pueblo di Aruba pa sigui proteha, aprecia y promove nos idioma pa futura generacionnan.