Red Democratico ta celebra 23 aniversario cu conferencia publico tocante HOFA

ORANJESTAD – Partido Red Democratico lo conmemora su 23 aniversario di existencia cu un conferencia especial tocante e tema actual di HOFA (consensus rijkswet di supervision financiero). E actividad lo tuma lugar diasabra 30 di mei, for di 10’or di mainta te 12’or di merdia na sala di AHATA na Caya Apeldam 2, Dakota.

Orador principal durante e conferencia lo ta mr.dr. Jayburtt Dijkhoff, un investigador independiente cu recientemente a publica diferente articulo den medionan local tocante e ley financiero HOFA y su impacto riba Aruba.

Red Democratico, funda riba 30 di mei 2003, ta continua promove dialogo y intercambio di idea tocante asunto importante pa futuro di Aruba. Aña pasa, durante celebracion di aniversario, e orador invita tabata mr. Michiel Bijkerk di Boneiro.

Organisadornan ta invita publico en general pa participa den e conferencia, cu entrada completamente gratis. Según Red Democratico, e actividad ta representa un oportunidad importante pa comunidad informa y intercambia opinion tocante futuro financiero y economico di Aruba.