HOH ta celebra su personal cu siman yen di aprecio y inspiracion

ORANJESTAD – Horacio Oduber Hospital (HOH) a celebra su “Staff Appreciation Week 2026” cu un serie di actividadnan especial pa honra y aprecia tur empleado cu diariamente ta dedica nan mes na cuido di pashentnan. E tema di e aña aki tabata “Wanderlust”, enfoca riba exploracion, inspiracion y union entre coleganan.

Durante e siman, empleadonan a participa den diferente actividadnan manera desayuno especial, workshopnan, caminata, “scavenger hunt” y competencia creativo entre departamentonan. Tambe a dedica atencion especial na Dia Internacional di Enfermeria, unda profesionalnan di enfermeria a ricibi un regalo di aprecio pa nan compromiso constante cu pashentnan.

Presidente di Hunta di Directiva, Jacco Vroegop, a expresa su orguyo pa tur empleado di HOH, enfatizando cu nan ta e forza tras di exito di hospital. Segun dje, Aruba tambe mester sinti orguyo di e trabou cu e personal ta haci tur dia.

Miembro di Hunta di Directiva, Gregory Croeze, a destaca cu apesar di avance den tecnologia y inteligencia artificial, ta e empleado humano cu ta sigui e curason di hospital y cu amor ta brinda cuido directo na pashentnan.